Riba Morto i Muri:

Nos Futuro Speransa

Dios a krea sernan humano pa gosa eternidat den un relashon di amor kunE i Su kreashon. Pero e relashon akí a ser korumpí pa e aparishon misterioso di piká denter di e kortenan selestial (Isa. 14:12–15, Ezek. 28:12–19, Rev. 12:7–12) i e kaida supsekuente di Adam i Eva (Gen. 3:1–19, Rom. 5:12). Trágikamente, morto a inundá no solamente e rasa humano sino henter bida tambe. Por mira ekspreshonnan di morto awendia den e blachinan ku ta kai for di e palunan, e flornan ku ta marchitá den nos vasnan, nos bestianan di kas inosente ku ta muri den agonia, i nos sernan kerí ku ta ser tumá for di nos di forma asina brutal. Nos mundu ta yen di sufrimentu i lágrimanan ku no por seka.

Anhelando pa un mihó mundu, hende a pinta pa nan mes hopi “paraiso” den kua nan lo ker a biba. Por ehèmpel, na 1933 novelista ingles James Hilton a emití su buki, Lost Horizon, ku poko aña despues a ser kombertí den un pelíkula bou di e mesun título. E pelíkula a kapta e situashon prekario di un avion ku su kombustibel ta kaba, i finalmente ta dal den e Serunan di Himalaya kubrí ku sneu. E piloto ta muri den e choke, pero e poko ku a sobrebibí ta ser saká for di e ruinanan i eskoltá pa un grupo di tibetano na e vaye di Shangri-La ku ta parse un paraiso. Isolá di e mundu eksterno, e habitantenan ta krese den amor i sabiduria, bibando un bida kasi inmortal di harmonia i goso duradero.

Naturalmente, e ta solamente fikshon.

Komo sernan humano mortal, nos mester di siguransa den presente i speransa pa futuro. Manera e teólogo suiso Emil Brunner a deklará korektamente, “Loke oksígeno ta pa e pulmonnan, asina speransa ta pa nifikashon di bida humano. Kita oksígeno i morto ta tuma lugá a traves di asfiksia, kita speransa i humanidat ta limitá pa motibu di falta di rosea; desesperashon ta sigui, produsiendo e parálisis di podernan intelektual i spiritual pa medio di un sintimentu di e falta di sentido i propósito di eksistensia. Manera e destino di organismo humano ta dependiente riba e suministro di oksígeno, asina e destino di humanidat ta dependiente riba su suministro di speransa.”—Emil Brunner, Eternal Hope (London: Lutterworth Press, 1954), p. 7. En realidat, e speransa bíbliko ta sostené nos durante e krísisnan eksistensial ku nos ta enfrentá den nos biahe den direkshon di eternidat.

Kontrali na e Shangri-La fiktisio di Lost Horizon, nos speransa di bida eterno “no ta sigui fábulanan inventá ku astusia” (2 Pe. 1:16, NKJV). E ta basá riba e promesa konfiabel di Dios di un mundu perfekto sin mas lágrima, doló, òf morto (Rev. 21:1–5). E promesa presioso akí a inspirá e iglesia apostóliko i a ser mantené, i tesorá, pa hopi kristian a lo largu di siglonan. Sin nunka a pèrdè su poder, e mesun promesa akí ta duna nifikashon i propósito na nos bida presente. E ta permití nos wak ku konfiansa den futuro. E ta sigurá nos ku tur nos sernan kerí ku a muri den Kristu finalmente lo ser lantá for di morto pa heredá bida eterno.

E guia di estudio di Beibel aktual ta trata ku e tema di e gran konflikto entre bon i malu for di e perspektiva di dos tema prinsipal. Unu ta e orígen i eksistensia kontinuo di piká i morto. E otro tema ta Dios su obra perseverante pa resolvé e problemanan akí i trese e mundu bèk na su kondishon perfekto original. Enfasis spesial ta ser duná tambe na e naturalesa mortal di sernan humano i kon e resurekshon ta loke ta hiba na inmortalidat. En realidat, nos no mester tin miedu di morto pasobra Kristu a muri pa nos i a vense e poder di morto. Bon mirá, nos ta sigurá ku E tin “e yabi na morto i na e lugá di e mortonan” (Rev. 1:18, NCV).

E kuartal akí nos lo eksplorá e tema doloroso di morto, pero a traves di e lèns di e speransa ofresé na nos pa medio di Hesus.